Ձեր վստահելի աղբյուրը

ՀՅԴ խմբակցության պատգամավոր Արծվիկ Մինասյանը ԱԺ քառօրյա նիստերից մեկի ժամանակ, անդրադառնալով շրջանառության հարկի մասին օրենքի հետաձգման հարցին, նշեց, որ այս օրենքն ընդունվել է 2012 թվականին, ուժի մեջ մտել 2013 թվականից, և այդ ընթացքում, ըստ Մինասյանի, դարձել է առճակատումների պատճառ:

«Հնարավոր չէ՝ կայունություն լինի, եթե տնտեսական կյանքում անընդհատ օրենսդրական փոփոխություններ ենք մտցնում: Այդպիսով լարվածություն ենք ստեղծում: Երեք սկզբունքային հարց է մնացել այս օրենքի շուրջ՝ առաջինը վերաբերում է իրացման ծավալին: Երկրորդը հարցը վերաբերում է տոկոսադրույքին, երրորդը՝ փաստաթղթավորման պահանջին: Այս հարցերի շուրջ առաջացել է խառնաշփոթ: Այս պահին ութ նախագիծ կա նույն հարցերի շուրջ, և եթե պառլամենտում կա այսքան նախագիծ, պատկերացրեք՝ հասարակության մեջ որքան կարծիքներ ու տարբերակներ կլինեն»,- ասաց Մինասյանը:

«Զուտ քաղաքական հարց եմ համարում հետաձգումը, ի՞նչ է նշանակում մեկ տարվա ընթացքում կառավարությունը չկարողանա գործի մեջ դնել օրենքը»,- հայտարարեց ԲՀԿ խմբակցության պատգամավոր Միքայել Մելքումյանը:

Ըստ նրա՝ առևտրի ոլորտում մոտ հարյուր-հարյուր քսան հազար մարդ կա, և դա աշխատատեղեր են, որոնց հետ խաղալը ճիշտ չէ: Նրա խոսքերով՝ շրջանառության մոդելի փոփոխություն է արվում: Պատգամավորը նշեց, որ իրենք դեմ չեն փաստաթղթավորմանը, սակայն այն դեպքում, եթե իջեցվի շեմը:

ՀԱԿ խմբակցության պատգամավոր Հրանտ Բագրատյանը նշեց, որ Հայաստանում ստվերի խնդիր գոյություն ունենալ չի կարող: Ըստ նրա՝ կոմբինացիա մտածել պետք չէ, և հասարակ լուծում ունի այս հարցը:

«Ռեֆորմը չի կարող վատը լինել, բայց դուք տեղայնացնում եք այս օրենքները ձեր յուրահատուկ մոտեցումներով: Ժողովուրդը չէր ըմբոստանում թոշակների կուտակայինին, որքան նրան, թե ում էին գնալու այդ գումարները: ՀԴՄ-ի դեմ ըմբոստանում էին, որովհետև գիտեին՝ ով է ՀԴՄ-ները ներկրում: Ազնիվ չեն այս մոտեցումները: Ռեֆորմների երևույթն է լավը, ձեր մոտեցումը լավը չէ: Մեզ մոտ այս ռեֆորմների արդյունքում հարստանում են ռեֆորմ անողները»,- հայտարարեց ՀԱԿ խմբակցության պատգամավոր Արամ Մանուկյանը:

Նրա խոսքերով՝ ժողովուրդը չի վստահում կառավարությանը, քանի որ վերջինիս արած ռեֆորմների նպատակները չեն բխում ժողովրդի շահերից:

Նախորդող հրապարակումներ՝
«ՓՄՁ-ներին դարձնում ենք քավության նոխազը». Հեղինե Բիշարյան
«Ասում են՝ ձուկը գլխից է հոտում, հիմա մենք խոսում ենք պոչի մասին»